Nakab ot sa Barangay Rajah Soliman ang 1st Place sa pinakaunang Barangay Reading Center Incentive Program nga gipangunahan sa City Education Development Department. Gidawat ni Barangay Kapitan Rouel Conde ang plaque ug cash prize nga 50,000 pesos. Second place ang Barangay Maug nga nakadawat og 35,000 pesos ug plaque ug third place ang Barangay Baan Km. 3 nga nakadawat og 20,000 pesos ug plaque. Gawas niini, duna sab special award ang tulo ka Barangay nga gilangkuban sa Barangay Maguinda. Kini tungod sa nindot nga pakig alayon sa DepEd. Nakadawat sab og special award ang Barangay Santo Niño sa ilang koleksyon sa libro nga anaa sa ilang Barangay Reading Center, ug Barangay Bonbon tungod sa ilang hugot nga suporta gikan sa Sangguniang Kabataan. Ang Barangay Reading Center Incentive Program mao ang unang higayon nga gipahigayon sa CEDD isip pagsaulog sa Library and Information Services Month ug pagpadasig sa mga Barangay sa pagpatuman sa Barangay Reading Center alang sa mga kabataan ug mga residente nga mag hatag og giya para mahatagan og saktong impormasyon ang katawhan ug uban pang serbisyo nga gikan sa gobyerno. Ang aktibidad gitambongan sa mga Department Heads sa Lokal nga Panggamhanan sa Butuan, DILG City Director Ms. Annabel Yangson, ug mga validators sa natigayong validation sa BRC.