Nagkadaghan na ang mga barangay sa syudad sa Butuan nga nakabenepisyo sa pagpalambo sa mga rural roads sa barangay. Gani, hapit na mahuman ang road concreting sa Barangay Mandamo ning syudad nga usa sa nakabenipisyo sa Improvement of Various Rural Roads nga gipatuman sa lokal nga panggamhanan sa Butuan pinaagi sa City Engineers Office subay sa plano ug direktiba ni Mayor Ronnie Vicente Lagnada nga pagpalambu sa tanang dalan sa mga barangay sa rural areas tungod dinhi magsumikad ang pagsaka sa ekonomiya sa syudad. Sumala sa usa ka mag-uuma nga si Romulo Pangan daku na ang kausaban sa Barangay Mandamo kung ikumpara kaniadto. “Salamat kaayo nga sementado na ang Barangay Mandamo pila na ka tuig ko nga nagpuyo diri karon ra gayod nasemento. Kana bitaw’ng truck nga kargahan sa mais ug humay sauna maglisod na og tangas butangan pa namo og tahop sa humay ang dalan aron makalatas ang sakyanan. Karon hayahay na daku na ang kausaban daku kaayo akong pasalamat nga nasemento na ang Mandamo. Salamat kang Mayor RCL, kang Vice Mayor Law Fortun ug Congressman Joboy salamat nga nasemento na ang dalan sa Mandamo” Sumala ni Romulo Pangan. Mipaabot sab sa dakong pasalamat si Mandamo Punong Barangay Jose Cataluňa Jr. sa tibook pwersa sa kadumalahan ni Mayor Ronnie Vicente Lagnada tungod natagamtaman sa katawhan sa barangay ang dakung kalambuan ug kausaban apil na ang kasikbit nga munisipyo. Tungod niini, dakung kalipay sa tanan tungod ang kaniadtong duha ka adlaw nga byahe sa mga abot sa kaumahan gikan Mandamo padulong sa merkado karon minuto na lamang makaabot na sa merkado ug menus pa ang gasto. Ang Barangay Mandamo usa sa dunay dakung produksyon sa mais, humay, saging, lubi ug uban pang commodities hinungdan dakong bintaha ang hapsay ug maayong dalan tungod sayon na usab ang pagsulod sa mga negosyante nga mobubu og negosyo sa dapit.