Pormal nang giturn over sa lokal nga panggamhanan sa Butuan sa pagpanguna nila City Councilor Rey Desiata, Committee Chairman sa Urban Planning and Infrastructure ug City Engineers Office ang barangay hall sa JP Rizal kaganinang buntag. Mapasalamaton si JP Rizal Punong Barangay Roniel Cedro kang Mayor Ronnie Vicente Lagnada ug mga myembro sa sangguniang panlungsod sa pagtugot nga mahuman ang barangay hall nga dugay nang gipangandoy aron komportable na ang paghatag sa serbisyo sa katawhan. “Salamat sa atong mayor nga nahoman na ang atong barangay hall sauna pa gyod namo ni nga yangungu nga unta duna mi maayong facility nga magamit para sa among katawhan, sauna magtolo ug magbaha ang among karaan nga building medyo maglisod gyod mi kaniadto labi na naay senior citizens pero karon nindot na kaayo hinungdan nagpasalamat kaayo mi sa atong mayor,” sumala ni Punong Barangay Roniel Cedro. Gawas niini nga kalambuan sa Barangay JP Rizal nagpasalamat usab si PB Cedro kang Mayor Lagnada sa tanang proyekto nga gipaabot sa barangay sama sa pagpanindot sa kadalanan ug paningkamutan sab niini nga masulbad na usab ang problema sa drainage tungod medyo dugay-dugay na usab kini nga mulo sa katawhan. Gitimbaya ug gidayeg usab ni City Councilor Desiata ang City Engineer Office sa maayong pagpatuman sa proyekto tungod usa kini sa pasilidad nga gikinahanglan sa usa ka barangay alang sa paghatag sa maayong serbisyo sa katawhan . Sumala sa konsehal ang kalambuan sa syudad kalambuan usab sa tanang barangay. “Pag gwapo ang pasilidad gwapo usab ang atong paghatag sa serbisyo unya ang katawhan nga atong giserbisyuhan gwapo usab ilang kahimtang dili mabulad sa init conducive ilang sudlan kay limpyo makahatag sab kini sa hapsay nga paghatag sa serbisyo,” sumala ni Konsehal Rey Desiata. Gipaniguro ni City Councilor Desiata nga magtinabangay ang local ug national government aron makasigurong makaabot ang tanang proyekto sa kabarangayan sa syudad sa Butuan.