Gipahigayon sa Department of Agriculture pinaagi sa High Value Crops Development Program kun DA- HVCDP Gulayan sa Barangay Program Technical Working Group ang evaluation sa mga Barangay Local Government Unit nga nagpatuman sa Gulayan sa Barangay Program. Nakita nga ang Barangay Baan Km3 usa sa dunay best model farm o nagpatuman sa mga best practices nga haum sa Gulayan sa Barangay Program. Ang Barangay Baan Km3 dugay-dugay nang nagpromote sa vegetable gardening aron matubag ang food security sa kadumalahan ni Punong Barangay Gemma Tabada. Gipatuman sab niini ang communal garden ug vegetable nursery aron dunay access ang mga residente sa fresh produce ug kalidad nga binhi sa gulay nga pwedeng itanum mismo sa matag tugkaran. Nasayran ang mga gulay nga anaa sa communal garden sa Barangay Baan Km3 mao usab ang gamiton alang sa ginapahigayong feeding programs samtang ang uban nga gulay ipanghatag sa mga person with disabilities ug lactating mothers. Ang Barangay Baan Km3 nagtinguha sa malungtarong agriculture practices ug nagdasig sa tanan sa paggamit sa mga recyclable materials sa gardening ug paggamit sa organic fertilizer. Nagpasalamat si PB Tabada sa hugot nga suporta sa lokal nga panggamhanan sa Butuan ug Caraga State University ug ubang ahensya nga mihatag sa gardening inputs, technical training ug mga inobasyon sa agri-ecosystem sama sa agriboost project pinaagi sa agriboost comms aron mas mapahugtan ang pagpatuman sa communal garden project. Nakahatag sab og atensyon sa mga validators ug health professionals ang pagtanum sa Barangay Baan Km3 og mga herbal ug medicinal plants asa dakung tabang isip alternatibong tambal sa ginagmay’ng mga sakit. Ang Gulayan sa Barangay Program usa sa nasudnong inisyatibo sa DA nga aron makahatag sa saktong nutrisyon sa komunidad ug makab-ot ang food security.