Nagpahigayon og usa ka balidasyon sa komunidad ang Office of the Indigenous People, Culture, Heritage and Arts mahitungod na sa Ortograpiya sa Butuanon nga linggwahe sa SP Main Session Hall, Abril 13. Ang ortograpiya mao ang arte o praktis sa pagsulat sa mga pulong nga adunay tukma nga mga letra o simbolo sumala sa sumbanan o gidawat nga paggamit. Kini usab ang bahin sa gramatika nga nagtagad sa mga letra ug spelling o ang paagi diin ang mga pulong sa usa ka sinultian gi-spelling. Dinhi gipakita ug gi usa usa ang pagbasa sa mga pulong Binutwanon, spelling ug labina ang insaktong pagsulti. Ang proyektong natigayon pinaagi sa pagtambayayong sa lokal nga panggamhanan sa Butuan ug sa Komisyon ng Wikang Filipino kun KWF. "We have to preserve the language, because language and culture goes hand in hand. There is no culture if there is no language and likewise there is no language if there is no culture" sumala pa ni Bella Cultura Hernandez, Researcher ug usa sa nangusog sa pag preserba sa pinulungang Binutwanon. Gisugdan ang pagbuhat niini bulan sa Nobyembre miaging tuig. Daku ang iyang pasalamat nga nahuman na kini ug anaa na sa balidasyon ang ortograpiya nga Binutwanon. Gitambungan kini nila Vice Mayor Lawrence Lemuel Fortun, Konsehal Joseph Andaya, Konsehal Cherry Mae Busa, Konsehal Eduardo Gonzalez, mga validators, researchers, writers, DepEd Butuan, FSUU, CSU, ug Komisyon sa Wikang Pilipino kun KWF. Suportado sa SP Members ang lakang sa OIPCHA nga ma preserba ang lenguwahe nga Binutwanon. Nanghinaut nga pag mahuman na kini, mapasa na og mahimoan og ordinansa aron magamit na kini isip guide sa mga taga Butuan ug mapasigarbo kini sa tibouk nasud. Gipanghinaut nga mamahimo na kining usa ka libro, mahimuan og balaud nga legal nga basehanan aron magamit isip giya sa sakto nga paglitok, pagsulti ug pagbasa sa linggwahe nga Bu-twa-non. Gitinguha sa grupo nga mamahimo kining kabahin puhon sa kurikulum sag a tunghaan sa syudad sa tinguha nga magpabilin kini nga buhi nga pinulungan sa mga Butuanon nga angay nga ikapasigarbo.