Pormal nang gibuksan ang Balangay Inter-Barangay Cluster Basketball Tournament sa Barangay Limaha Covered Court sa pagpanguna ni City Vice Mayor Atty. Lawrence Lemuel Fortun, adlawng Biyernes. Walo ka cluster ang modula ug kada cluster dunay dose ka managlahing Barangay. "Ang akong ipaabot sa inyo gikan sa City Government, seryosohon nato ni, dili ni sila lingaw-lingaw lang. Of course lingaw-lingaw man gyud ni pero, this is a serious sports program. Usa ni ka pamaagi sa atong Mayor para matagaan og oportunidad ang tanan players sa basketball sa tanan Barangay, para makita nato inyong mga talento" mensahe ni City Vice Mayor Lawrence Fortun. Atol sa aktibidad nag oath of sportmanship ang mga players kauban ang ilang barangay kapitan, ug coach sa pagpanguna ni City Vice Mayor Fortun. Human sa oath of sportmanship, nipirma dayon sila sa commitment wall. Ang balangay inter-barangay cluster basketball tournament maoy una nga torneyo sa syudad nga by cluster sa tumong nga mag-ilhanay ang mga players sa nagkadaiyang mga barangay lakip nga maka build og camaraderie. Sumala ni SK Federation President Joseph Manuel Morcilla ang pagbuhat sa nasangpit nga programa dakug impact para sa pag develop sa skills development sa mga players. "Naa sab tay gipahigayon nga kampanya batok sa iligal nga droga, mao ng atong mga players, magpahigayon og drug test bag-o mo dula, para isiguro nato nga atong mga players, luwas ug limpyo sa ginabawal nga droga" dugang ni Vice Mayor Lawrence Fortun. Anaa ang presensya sa mga Barangay Kapitan, City Administrator Atty. Joseph Ian Sabado, Konsehal Reynante Desiata, Liga ng mga Barangay President Kapitan Gemma Tabada, CEDD Head Rosalito Libres, ug uban pa.