Gikalipay sa mga residente sa Barangay Camayahan ning syudad nga sementado na ang ilang dalan. Kini gumikan sa pagpangusog sa city government sa Butuan pinaagi ni Mayor Ronnie Vicente Lagnada uban sa tabang sa nasyunal nga panggamhanan pinaagi sa DILG nga nibubo og pondo alang sa farm-to-market road projects sa kabarangayan. Pinaagi niini nga proyekto mapasayon na ang pagbyahe sa tanang mag-uuma sa ilang produktong agrikultura ug sayon na usab ang pagsulod sa mga negosyante. Mapasalamaton ang usa ka single motor driver nga si Allan Mapandi sa dakong kabag-uhan sa ilang barangay tungod sa sementadong dalan. Sumala niya hayahay na ang iyang pagpamasahero ug dili na daling madaot ang iyang motor. “Para sa amo dako kaayo ning katabang nga kalsada kay ang sakyanan pod namo dili na mabun-og kaayo unya dali na kaayo makaabot sa syudad kay sementado naman deperensya na kaayo kay hayahay naman ang byahe,” pamahayag ni Allan Mapandi, residente sa Camayahan. Mipaabot sab sa dakong pasalamat si Camayahan Punong Barangay Marcelita Rodrigazo kang Mayor Ronnie Vicente Lagnada sa pagdala sa sunod-sunod nga kabag-uhan sa ilang barangay nga labing dakung tabang sa mga mag-uuma asa sayon na ang byahe sa ilang mga abot sa uma padulong sa merkado ug ubos na ang gasto.