Gikalipay sa mga residente ang pag abot sa farm-to-market road sa Barangay Anticala ning syudad tungod dili na kini maglisod sa pagbyahe sa ilang mga produkto sa umahan ug dali na usab ang byahe sa mga supplies o stocks alang sa mga gagmay’ng negosyante. Sumala sa negosyante ug mag-uumang si Wilma Garzon dili lalim ang ilang kasinatian kaniadto tungod sa kalapok sa ilang dalan nga malubong ug mangatumba pa ang motorsiklo nga ilang sakyan. “Nagpasalamat ko sa naghatag kanamo og karsada kay ang among panginabuhi hayahay na kay sauna gyod arang kaguba ang karsada maglisod mig tungas sa among mga gulay padulong sa Butuan unya sa una magmotor mi mahal ang pamasahe sige pa gyod katumba mangalata na among mga karga mga baligya para Butuan,” sumala ni Wilma Garzon. Ang nasangpit nga proyekto nahimong posible tungod sa pagtinabangay sa composite team nga gilangkuban sa DILG, PNP, Philippine Army ug city government sa Butuan nga gimugna sa gobyerno ug mikanaug sa barangay level aron masayran ang nag-unang panginahanglanon sa matag barangay. Kini nga proyekto gipunduhan sa DILG ubos sa programang National Task Force-End Local Communist Armed Conflict kun NTF-ELCAC pinaagi sa Local Governmet Support Fund-Support Barangay Development Program kun LGSF-SBDP ug gipatuman sa City Engineers Office subay sa plano ug direktiba ni Mayor Ronnie Vicente Lagnada tungod sa mga rural barangays nagsumikad ang pagtaas sa ekonomiya sa syudad gumikan sa lain-laing produkto nga pwedeng ikapasigarbo sa ubang dapit.