Personal nga gibisita ni Senator Christopher Lawrence "Bong" Go ang syudad hilabi na ang Ampayon-Butuan Super Health Center sa Barangay Ampayon, adlawng Martes. Gisugdan bulan sa Nobyembre miaging tuig ang pagtukod sa Ampayon Super Health Center. Isip Chairman sa Komitiba sa Panglawas sa Senado giduso ni Sen. Bong Go nga mapaduol ang serbisyong medikal sa kadaghanan hilabi na ngadto sa mga hilit nga lugar. Nakita nga daghan ang walay access sa hospital. Magsilbi ang Super Health Center nga medium type nga Polyclinic asa aduna nay Birthing, Dental, ug Laboratories. Pinaagi niini makunhoran ang ihap sa mga pasyente sa hospital tungod ma cater na sa Super Health Center ang mga minor cases. Gikalipay usab sa Lokal nga Panggamhanan sa Butuan sa pagpanguna ni Butuan City Mayor Ronnie Vicente Lagnada ang gihatag nga ekipo ilawom sa Department of Health ngadto na sa Super Health Center. Gilauman nga magamit na ang Super Health Center karong tuiga nga labing gikalipay sa City Health Office aron mas daghan pa ang maserbisyohan sa mga personahe.