Malampusong napresentar sa mga buhatan sa lokal nga panggamhanan sa Butuan ilawom sa Environment Development Sector nga gilangkuban sa City Disaster Risk Reduction Management Office ug City Environment and Natural Resources Office ang Annual Investment Program alang sa tuig 2024. Kini atol sa Butuan City Development Council 2nd Quarter Sectoral Committee Meeting sa Pavilion Convention ning syudad sa pagpanguna sa City Planning and Development Office uban sa pipila ka Punong Barangay ug Civil Society Organizations. Subay sa gipresentar sa CDRRMO nga AIP 2024 giduso niini sa komitiba ang gikinahanglang pondo nga muabot sa kapin 42 milyon pesos alang sa mga programa ug proyekto nga ihatod sa katawhan apil na ang pagpangandam sa kalamidad asa posibleng muabot sa syudad sa Butuan. Samtang kapin 98 milyon pesos ang pondong giduso sa City ENRO ngadto sa komitiba alang usab sa nagkadaiyang programa ug proyekto nga nakahan-ay sa padayong paghatag og serbisyo sa mga Butuanon apil na ang pagproteher sa kinaiyahan. Human sa mga presentasyon gihatagan sa higayon ang mga Punong Barangay ug CSOs nga mopadayag sa mga suhestyon kabahin sa pagpalambo pa sa mga programa tungod isa sila nga makabenipisyo niini.