Malampusong napresentar ang mga Department Head sa mga buhatan sa lokal nga panggamhanan sa Butuan ilawom sa Economic Sector uban sa barangay ug Civil Society Organizations ang Annual Investment Program o AIP sa tuig 2024 nga gipahigayon sa Watergate Hotel and Convention. Kini atol sa unang adlaw sa gipahigayong Butuan City Development Council Economic Development Sector Working Committee sa pagpanguna sa City Planning Development Office. Pinaka-unang mipresentar sa AIP ang City Business Permits and Licensing Office asa gikinahanglan niini ang suporta sa BCDC Full Council sa overall estimated investment cost nga miabot sa kapin 32 million pesos. Kini alang sa streamlining ug digitalization sa proseso sa buhatan ug uban pang programa. Ikaduha mipresentar sa AIP ang City Agriculture and Veterinary Department nga may overall estimated investment cost nga miabot sa kapin 1billion pesos alang sa pagpatuman sa lain-laing programa ug proyekto. Gilangkuban kini sa pagpatuman sa Agriboost project, Farm-to-Market road gikan sa Barangay Bugsukan-De Oro-Camayahan, Banana Production Consolidation and Marketing Enterprise, Regional Agriculture Trading Center with Cold Storage. Lakip na niini ang updating sa Butuan City Agricultural Profile ug ang pag-ila sa haum nga commodities nga anaa sa tanang barangay. Samtang niabot sab sa kapin 38 million pesos ang overall estimated investment cost nga giendorso sa City Tourism and Cultural Affairs Department sa BCDC Full Council alang sa tinuig nga mga aktibidades nga pangunahan niini. Gi-endorso sab sa City Employment Services Department kun CESD ang overall estimated investment cost nga miabot sa kapin 51 million pesos sa BCDC Full Council. Ang CESD usa sa bag-ong departamento nga gilangkuban sa PESO ug BCMTC asa nagtutok sa paghatag og trabaho ug mga pagbansay sa mga Butuanon. Pinaka-ulahi nga mihatag sa presentasyon ang City Economic and Business Development Department asa dunay overall estimated investment cost nga miabot sa kapin 124 million pesos. Ang nasangpit nga departamento gilangkuban sa City Trade Industry and Investment Program Office, City Cooperative and Development Office ug City Enterprise Economic Office asa usa sa gitutukan ang pagpadaghan sa negosyo sa syudad. Sumala ni Engr. Pierre Anthony Joven, Chairperson, BCDC Economic Development Sector Working Committee ang aktibidad kabahin sa pagpalambo sa paghatag sa serbisyo pinaagi sa streamline na nga mga buhatan. Pinaagi sa padayong pag adopt sa digitalization mas paspas na nga pagtubag sa lain-laing issues ug concern nga magsumikad sa kabarangayan ug mas organisadong mga buhatan subay sa development direction ni Mayor Ronnie Vicente Lagnada. Ang BCDC Sectoral Working Committee Meeting magpadayon hangtud Hunyo 23, adlaw’ng Byernes.