Hapit na magamit ang Agusan Bridge nga nahimutang sa Barangay Bilay East patabok sa Tagpulangi Barangay Dulag West ning syudad sa Butuan. Kini sa pagpatuman sa Department of Public Works and Highways Caraga Regional Office kun DPWH uban sa hugot nga suporta sa City Government sa Butuan pinaagi ni Mayor Ronnie Vicente Lagnada. Usa kini sa Multi-Year nga proyekto nga nagkonekta sa East hangtud West lateral road padulong Agusan del sur/ Agusan del Norte hangtud Bukidnon, Bilay padulong Dulag Section. Duna kini katas-on nga 7.340km nga nagsugod sa dalan sa JCT Daang Maharlika (alternate route NRJ padulong sa Mayor Democrito Plaza II Avenue padulong Las NIeves hangtud Sibagat ug Butuan City padulong Malaybalay Road). Usa sab kini sa Inter-Regional nga nagkonektar sa Caraga Region ug Region 10 nga makatabang sa pagpromote sa biodiversity sa tibook Mindanao ug mopalambo sa eco-tourism, agriculture, industry ug domestic trade sa tibook rehiyon. Tungod niini positibo si Mayor Lagnada nga modagsa ang mga investors nga mobubo og negosyo sa dapit ilabina sa mga kasikbit nga barangay gumikan mokunhod na ang oras sa byahe sa mga supplies ug mga produkto sa mga mag-uuma. Nagpasalamat si Barangay Bilay Punong Barangay Anecito Tacmo sa bag-ong kalambuan sa barangay tungod mas makatabang kini sa mga silingang barangay gikan sa tabok nga bahin sama sa Barangay Dankias ug Tungao padulong sa Polyclinic nga nahimutang sa barangay. Sumala pa minuto na lamang ang byahe makaabot na sa clinic tungod dili na kini mulibot pa. Lauman nga karong tuiga magamit na ang Agusan Bridge.