Usa-usang gitan-aw ug gireview sa komitiba sa appropriation ug accounts sa pagpanguna ni Butuan City Vice Mayor Lawrence Fortun ang gisumite sa mga barangay nga Annual Budget ug budget proposal alang sa tuig 2024. Gi-aprobahan sa komitiba ang budget proposal aron masulod kini sa SP enbanc ug maaprobahan sa tibuok konseho. Gilangkuban sa Barangay Imadejas, Dulag, Santo Nino, Fort Poyohon, Bugsukan, Aupagan, Maon ug SK sa Obrero ang nasangpit nga committee hearing. Gisiguro sab nila City Councilor Rey Desiata, Cherry May Busa ug John Gil Unay nga sakto ug haum ang gibutang nga mga programa ug proyekto sa proposal ilabina sa hisgutanan sa pagpalambo sa serbisyo sa katawhan sa matag barangay ilabina sa imprastraktura ug social services. Atol sa maong tigum gikompirma sa City Budget Department nga sa karon dunay 56 ka barangay ang nareview na ang annual budget sa tuig 2024. Tungod niini gidayeg ni Vice Mayor Fortun ang mga barangay nga nakasumite na sa annual budget aron sayo usab maaprobahan.