02/22/2008 - ni: Romy B. Peña, Info. Asst. II

MASS CIVIL WEDDING MALAMPUSON

Mokabat sa 17 ka parisan nga nahimong legal nga magtiayon human gibug-os ang ilang duha ka kasingkasing pinaagi sa Mass Civil Wedding nga gipahigayon niadtong adlaw nga Huwebes Pebrero 21, 2008 didto sa 3rd floor People’s Hall, City Hall ning dakbayan.

Ang gipahigayon nga Mass Civil Wedding, ubos sa pagpasiugda sa buhatan sa City Civil Registrar sa pagdumala ni Ms. Judith A. Calo, ug kini usa ka special program ni City Mayor Democrito D. Plaza II, alang sa mga mansibado nga nag-ipon sulod sa 5 ka tuig nga wala makasal. Ang mga kaslunon malipayong miatubang ug namumpa atubangan sa Mayor ug misaad nga tumanon ang ilang kaakohan isip magtiayon.

Sa mensahe sa Mayor, iyang gidasig ang mga magtiayon nga mahalon ug panggaon ang ilang mga anak. Ug hatagan sa maayong kaugmaon pinaagi sa edukasyos aron sa ingon ang mga kabataan dili mahitumpawak sa kadautan ugma damlag. Human sa seremonyas sa kasal adunay salo-salo nga giandam alang sa mga gikasal.

---

DOH SECRETARY MIDUAW SA DAKBAYAN SA BUTUAN

Miduaw niadtong adlaw nga huwebes, Pebrero 21,2008 si Secretary Francisco T. Duque arong pagtambong isip keynote speaker sa gipahigayon nga 1st ILHZ Summit and Regional Anti-Dengue Intensification Canpaign nga gipahigayon sa Balanghai Hotel and Convention Center ning dakbayan sa Butuan. Kinin usa ka adlaw nga kalihokan nga nagdala sa tema “Sa ILHZ, TO DOH Lakas Laban sa Dengue".

Ang gipahigayon nga kampanya sa Anti-Dengue gitambongan sa mga kadagkuan sa DOH Caraga, mga Provincial ug Municipal Health Officer mga Mayores sa kinatibok-an bahin sa reheyon. Gidasig ni Sec. Duque ang mga Health Officer, nga ipalig-on ang kampanya sa Dengue sa ilang mga tagsa tagsa ka mga dapit.

Sa mensahe ni City Mayor Democrito D. Plaza II gikalipay niya ang pagpahigayon sa maong kalihokan isip host sa dakbayan sa Butuan ug gidawat ang tanang nga bisita ug naglaum nga mamahimong malamposon ang kampanya sa pakigb atok sa sakit nga Dengue.