02/18/2008 - ni: Romy B. Peña, Info. Asst. II

MGA NATAPOS UG PLANO NGA PROYEKTO NGA PAGATUKURON

Ubay-ubay sa mga proyekto sa tuig 2007 ang natapos ug napahimoslan sa katawhan sa dakbayan sa Butuan. Kini ang giklaro ni City Engineer Enily P. Gayon usa niini mao ang pagkongreto sa dalan gikan sa taboan, langihan lagoon paingon sa fish landing, nga nagkanditad ug 12 milyon ka pesos lakip na ang drainage system.

Ug niining tuig 2008 giplano sa City Government sa administrasyon ni City Mayor Democrito D. Plaza II, ang pagtukod ug upat ka building sa taboan area nga kompleto sa pasilidades sa sugang dagitab ug pansayan nga sarang ka plastaran sa mga mag-uuma ug mga nigosyante sa ilang nagkadaiyang baligya. Gawas niana pagatukoron usab ang Van Terminal diin adunay laing building ang pagatukoron dinha sa daang hospital nga nagkantidad ug 6 milyon ka pesos lakip na ang pansayan ug waiting shed.

Samtang padayon usab ang pagpalambo sa pagatukoron nga MDG Park nga ipahimotang sa ubos nga bahin sa daan tulay sa Magsaysay nga gituohan nga usa sa tourist destination sa reheyon sa Caraga.

---

TOTAL REHAB SA PUBLIC TOILET HIMOON

Andam na ang program of work alang sa himoon nga total rehabilitation sa public toilet sa merkado publiko sa langihan. Kini ang gipasbot G. Escasio Asst. Market Supervisor. Matod ni G. Escasio, nga aprobado na ang ilang hangyo ngadto kang City Mayor Democrito D. Plaza II, sa pag-usab sa maong pansayan aron sa ingon nga padayong mapahimoslan sa mga nigosyante ug mga dumodoong sa merkado sa langihan.

Dugang sa maong opisyal,nga gawas sa rehabilitation sa daang pansayan magtukod usab ug laing CR sa atbang nga bahin aron dugang kapahimoslan sa katawhan. Sa pagkakaron kompleto na ang pagpahimotang sa drainage system sa palibot sa Mercado publiko, ug gilauman nga niining tuiga maatiman usab ang drainage sa sulod nga bahin sa Mercado nga walay sagabal sa katawhan.

---

BARANGAY HALL SA KINAMLUTAN NAPAHIMUSLAN NA

Daku ang kalipay nga gibati sa katawhan sa Barangay Kinamlutan human magamit ug napahimoslan ang bag-ong natapos nga Barangay Hall. Sa pakighinabi kang Barangay Secretary Helen Ravelo, nagkanayon nga ilang gipaabot ang mainitong pasalamat ngadto kang City Mayor Democrio D. Plaza II, nga wala makawang ang ilang gihangyo.

Ang maong edepisyo nagkantidad ug 2.5 milyon ka pesoso nga kompleto sa pasilidades sa sugang dagitab, tubig ug ubang galamiton sa maong buhatan. Gidugang ni Gng. Ravelo nga dugang nilang ihangyo ang budget alang sa pagpintal sa maong gambalay. Ang 2 storey building nga Barangay Hall, mao ang usa sa pinakaanindot nga gitukod sa 86 ka Barangay sa syudad sa Butuan.

Sa pagkakaron sulod ug gawas ang mga katawhan sa maong dapit alang sa nagkadaiyang panginahanglan, ug naglaum nga dugang proyekto ang maangkon gikan sa City Government ubos sa administrasyon ni Mayor Boy Daku Plaza II

---

GITOKOD NGA BRGY. HALL SA STO NIÑO 50% NA ANG NATAPOS

Sa dugay nga katuigan nga nilabay ang Brgy.Sto.Niño karon lamang nakabaton ug 2 ka andana nga Brgy. Hall. Kini ang gibutyag ni Punong Barangay El Rosal, sa naasoy nga dapit.

Sigun sa maong opisyal nga human sa iyang paghulip sa nitaliwan nga Punong Barangay. Kini ang iyang gihanyo sa Halangdong Mayor Democrito D. Plaza II, ang pagtukod sa bag-ong Brgy. Hall. Gikalipay sa maong opisyal nga human sa iyang pagkapili isip Brgy. Captain sa niaging piniliay na hatagan og katumanan ang tanan. Human usab mapalit sa City government ang usa ka hektarya nga luna sa yuta nga gipahimutangan sa maong gambalay nga kantidad ug 400,000.00 mil. ka pesos samtang ang maong building nga gitukod nagkantidad ug 2 milyones ka pesos kapin kong kulang.

Gidugang sa maong opisyal nga gawas niana nga proyekto, pagatukoron usab ang basketball ug covered court sa maong dapit.