02/13/2008 - ni: Romy B. Peña, Info. Asst. II

VAN TERMINAL PAGATUKURON

Andam na ang gihimong program of work alang sa pagatukoron nga Van terminal nga ipahimotang sa daan nga City Hospital sa Langihan ning dakbayan. Kini ang gikomperma ni City Engineer Enily P.Gayon human sa gipahigayon nga pagsusi sa maong dapit ni City Mayor Democrito D. Plaza II.

Sigun pa sa maong opisyal nga sa dili madugay pagatukoron ang usa ka building alang sa gikaingong mga sakyanan nga nagkantidad ug sais (6) milyones ka pesos nga adunay comfort room (CR) ug waiting shed nga sarang kapahulayan sa mga pasahero. Tumong ug tuyo sa Mayor nga dili maghuot ang kadalanan sa langihan area tungod sa wala maplastar nga mga sakyanan.

Samtang giandam na usab ang pag repair sa pansayan sa merkado publiko sa langihan. Dugang ni Engr.Gayon, nga himoon ang total rehabilitation sa maong public toilet. Gawas niana dugang pansayan ang pagatukoron atbang sa naandan nga pansayan aron dugang kapahimuslan sa katawhan ug sa mga negosyante sa naasoy nga dapit.