01/21/2008 - ni: Romy B. Peña, Info. Asst. II

PROGRAMA UG KALIHUKAN SA CITY HEALTH PADAYON

Ubay-ubay sa mga programa ug kalihukan ang nahatag nga serbisyo sa City Health Office sa miaging tuig 2007, kini ang gikompirma ni Dra. Josephine Chua, City Health Officer.

Sigun ni Dra. Chua, nga adunay 7,204 ka mga buntis nga inahan ang gipaagi sa Pre-Natal check-up sa nagkadaiyang kabarangayan ug Health Centers, samtang 7,704 ang nahatagan ug injection sa Tetanus Toxoid. Adunay 8,047 ang nahatagan ug Full Immunization nga kabataan ug 7,844 sa Hepa-B Vaccine.

Gawas niana, ang maong buhatan nagpahigayon usab ug Felariasis Mass Treatment ngadto sa mga barangay nga gituohan nga adunay natakbuyan sa gikaingong sakit. Kini ang matang sa sakit nga pinaagi gihapon sa pinaakan sa lamok apan ang timailhan modako ang bitiis sa lalaki ug modako ang dughan sa babaye kung matakboyan sa maong balatian. Nagpahigayon usab ug Diabetes Screening ug Cholesterol Count matag bulan ngadto sa nagkadaiyang barangay.

---

LTTMO PADAYON SA PAGPATUMAN SA BALAOD SA TRAPIKO

Sa tuig 2007 ubay-ubay ang natigayon nga pagpangdakop sa mga operators ug drivers sa pampasaherong sakyanan nga nagabiyahe sa palibot ug gawas sa atong syudad. Kini maoy giklaro ni G. Alfredo Radaza, hepe sa maong buhatan.

Sigun sa maong opisyal, nga hugot ang pagpatuman sa iyang buhatan sa pagpangsikop niadtong mga operators ug drivers nga nakalapas sa mga Ordinansa sa syudad ug balaod sa trapiko. Diin sa tuig 2007 mokabat sa 5,091 ka mga drivers nga nakalapas ug wala motuman sa balaod sa trapiko ang nakabayad ug multa.

Dugang ni G. Radaza, nga mokabat sa kantidad nga Tres Milyones ka Pesos kapin ang nakolekta sa mga personahe sa maong buhatan. Hinungdan nga gipahigayon ang Safety Driving Seminar ngadto sa mga drivers dili lamang sa urban lakip na usab sa rural barangay diin ang mga Barangay Officials maoy gihatagan ug katungod sa pagkolekta sa multa gikan sa malapasong drivers.