01/18/2008 - ni: Romy B. Peña, Info. Asst. II

BMC ANAA NA SA LEVEL 3 TERTIARY HOSPITAL

Ang Butuan Medical Center (BMC) nga nag-alagad sa dakbayan sa Butuan ug sa mga kasikbit nga lalawigan sa rehiyon Caraga nagsugod na sa operation isip level 3 tertiary hospital sugod niining bulan sa Enero 2008.

Kini ang gibutyag ni Dr.Wilfredo Dulo, (Hosptal Director). Sumala sa maong opisyal nga ubay-ubay na sa mga katawhan ang naalagaran sa maong tambalanan. Diin sa tuig 2007 adunay gipahigayon nga libreng operasyon sa mga bungi ug mokabat na sa 80 ka pasyente ang naatiman. Sa gipahigayon nga Barangay Visitation sa Mayor, sa susamang tuig nagpahigayon ug libreng operation tuli nga mokabat sa 762 ka kabataan ang nakapahimolos.

Dugang pa ni Dr. Dulo nga moabot sa 182 ka pasyente ang modangat ug mahilandeg sa maong tambalanan matag adlaw, ug sulod sa usa ka tuig sa 3rd ug 4th quarter mikabat na sa 20,460 ka pasyente na ang naconfine ug naalagaran samtang 136 ka pasente ang naoperahan sa major Surgery ug 195 sa minor operation.

Ang BMC nahimong tertiary level hospital tungod sa kumpleto sa high tech nga kahimanan, sa luag, kaanindot ug kalimpyo niini. Adunay kaugalingong kapilya nga gipatukod ni Mayor Democrito D. Plaza II alang sa mga nahing tungdan pamilya sa pasyente nga manalangin sa kahitas-an. Gilaoman nga niining tuiga makompleto na ang pagkongkreto sa palibot lakip na ang landscaping.

---

CITY HOUSING MAGTUKOD UG DUGANG PANIMALAY

Ang panggamhanan sa dakabayan sa Butuan pinaagi sa buhatan sa City Housing and Development Office nga ubos sa kadumalaan ni Engineer Lorden Vismanos, nakahatag ngadto sa mga kabus nga katawhan nga naapektuhan sa demolisyon sa kilid nga bahin sa suba sa Agusan ug sa ubang dapit sa atong syudad nga matawag nga illegal settlers ug luna sa yuta ingon man panimalay.

Ang Balangayan Butuan, usa ka programa sa pabalay nga gimugna ni Former Mayor Daisy B. Plaza ug gipadayon ni Mayor Democrito D. Plaza II sa iyang kasamtangang administrasyon. Mokabat sa 6,488 ka pamilya ang target sa City government nga i-relocate sa nagkalain-laing relocation sites dinhi sa syudad sa Butuan.

Adunay 50 kapin kung kulang ka pamilya ang anaa gipahimutang sa Butuan New Village sa Bgy. Mahay samtang 488 ka pamilya ang gipahiluna sa Bgy. Pagatpatan Relocation Site sa pagkakaron. Adunay nahibilin nga 60% ang gilauman nga ma-relocate karong tuiga.

---

BUTUAN ELECTRIC COOPERATIVE PLANONG TUKURON

Ang Panggamhanan sa Dakbayan sa Butuan, pinaagi sa City Cooperative Enterprise and Development Office (CCDO) nga gidumala ni Mr. Chito F. Dagani, nagkanayon nga giplano ang pagtukod ug Electric Cooperative alang sa mga konsumador sa syudad sa Butuan.

Sigun ni Mr.Dagani nga tuyo ug tumong ni City Mayor Democrito D.Plaza II, nga matabangan ang mga katawhan sa Butuan pinaagi sa ubos nga balayronon matag bulan, ug karong tuiga gipaningkamotan nga masugdan ang pag-andam ug pagproseso sa mga rekisitos nga gikinahanglan nga makompleto.

Gidugang sa maong opisyal nga ang buhatan sa City Cooperative nakahimo sa pag-organisa sa tulo ka dagkong kooperatiba, kini naglangkob sa tulo usab ka grupo, Muslim, Christian ug Lumads ug uban pa. Diin mokabat sa milyon ka pesos ang gipahulam nga kantidad ngadto sa nagkalain-laing kooperatiba sa syudad sa Butuan. Nasayran nga adun ay pipila ka mga kooperatiba ang nakabaton ug minilyon nga pondo sa salapi ug kini milambo tungod sa ilang pagpaningkamot.